Naš Mikula, koj f korpe nosi dare, bil je oblečen v belo dogačko opravo. Na glave je imal biškupsko kapo a v rokaj biškupskoga štapa. Dare je nosil male dece na dva načina. Išel je od iže do iže, ne znam jel po redu ili samo one dece koja so dobra. Spočetka je delil oreje, jaboke i gde kojega svilnoga bombona, a posle je prešel na čokolade, kekse, i kinderjajca. Nega je pratil dlakavi, z repom i z rogmi Krampus koj je škrebal z lancom mam od vulice. Na zvuk lanca deca so bežala pod stol, za ormar ili mame za sukno, jel je Krampus znal s šibom po listanke oplesti. Ulaznica za primanje darov bil je Očenaš i prisega da boš dober. Drugi način je da dete mora navečer, den prede Mikulijna, naglancati čižmo i deti v oblok. Prije toga se podrazumeva da se omekne kvačica na obločecu da Mikula more z vulice dare deti f čižmo. Sečam se kak sem negda i po dva pot kontroleral da nesem morti ostavil zaprtoga obločeca. Normalno, drugi den zora-međa i beš glet f čižmo kaj je donesel. Dari so bili isti, s tem da so f čižmo Mikule kesne ostavlali pištole i mobitele, jel se od čokolade kvare zobi. F prvom slučaju Mikula je bil sused, tetec, vujec a moguče i nešče s familije. V drugom slučaju to je bila mama, a bormeš i baka koja je dela i mimo čižme, ovisno o količine kvara kojega si napravil i kuliko pot nesi poslunol. Denes so Mikula i Krampus ostarali, bole je noge, dobili so vene i išijasa i više nejdo z dari. Čižme se više ne namečo v oblok jel deca denes nose patike a čokolado, kekse i bombone jedo tri pot k obroku na den a mobitele dva pot na leto, pa toga i neso želni. Na mesto Mikule denes ordinera nekakov bača z belom bradom i f crlene oprave koj prodaje koka-kolo. kak se zove, on to ni sam ne zna.


Tekst: Vladimir Miholek